ئاگربەستی ئێران و ئیسرائیل نرخی خانووبەرە لە هەرێمی کوردستان بەرز دەکاتەوە

ئاڤا نیوز

 

ئاگربەستی ئێران و ئیسرائیل و بڕیارێکی حکومەتی هەرێمی کوردستان، کاریگەری دروست کردووە لەسەر زیادبوونی خواستی کڕینی زەوی، شووقە و خانوو و نرخەكانیشیان بەرز بووتەوە.

 

وێنە گەورەکە: جەنگی ئێران و ئیسرائیل کاریگەریی ڕاستەوخۆی لەسەر جموجۆڵی بازرگانی و سێکتەرە دارایی و ئابوورییەکانی ڕۆژهەڵاتی ناوەڕاست دروست کرد، وەستانی شەڕەکەش وردە وردە کاریگەرییە نەرێنییەکانی لەسەر ناوچەکە کەم دەكاتەوە.

 

لێدوانی فەرمی: نیاز نەسرەدین، بەرپرسی بۆرسەی عەقاراتی هەولێر بە ئاڤا میدیای گوت: دوای ئاگربەستی نێوان ئێران و ئیسرائیل نرخی زەوی و خانوو هەڵكشاوە، بۆ نموونە ئەو زەوییانەی نرخیان لە نێوان 10 هەزار بۆ 20 هەزار دۆلارە، هەنووكە هەزار بۆ هەزار و 500 دۆلار نرخیان بەرزتر بووەتەوە.

 

زانیاریی زیاتر: بە گوتەی نیاز نەسرەدین، ئێستا خەڵک لە وڵاتانی ئەوروپا و باشوور و ناوەڕاستی عێراق زەوی و یەکەی نیشتەجێبوون لە هەرێمی کوردستان دەکڕن، ئەمەش وایکردووە خواست و نرخی زەوی، شووقە و خانوو زیاتر بەرز ببێتەوە.

 

گۆشەیەکی دیکەی دیمەنەکە: ئاری عەلی، سەرۆکی کۆمەڵەی نێوەندگیری و ڕاوێژکاری خانووبەرە لە سلێمانی بە ئاڤای گوت: دوای ئەوەی حکومەتی هەرێمی کوردستان بڕیاری دا هەر بیانییەک موڵکێکی سەروو 50 هەزار دۆلار بکڕێت ئیقامەی پێدەدرێت، بەشێکی بیانییە نیشتەجێكانی هەرێمی کوردستان، دەستیان كردووە بە كڕینی زەوی و خانوو، بێگومان ئەمەش کاریگەری لەسەر بەرزبوونەوەی نرخ دەبێت.