لێدوانی نوێی بەغدا لەبارەی مووچەی فەرمانبەرانی کوردستان

ئاڤا نیوز

سەرۆکوەزیرانی عێراق بەڵێنی داوە ئەم سێشەممەیە لەبارەی ڕێککەوتنی هەولێر و بەغدا لەسەر نەوت و مووچە وەڵامی حکومەتی کوردستان بداتەوە، بەڵام دیارنییە بە چ شێوازێک دەبێت، لە کۆبوونەوەی ئەنجوومەنی وەزیران دەبێت یان دوای کۆبوونەوە دەبێت.

وێنە گەورەکە: هەوڵەکان بۆ چارەسەرکردنی کێشەکانی نێوان هەولێر و بەغدا بەردەوامن و ناردنی مووچە و هەناردەکردنەوەی نەوتی کوردستانیش مژاری سەرەکی کۆبوونەوەی ئەم هەفتەیەی ئەنجوومەنی وەزیرانی عێراق دەبێت، چاوەڕوان دەکرێت بڕیاری کۆتایی بدرێت.

زانیاریی بەدەستهاتوو: لە هەرێمی کوردستانەوە بەردەوام تەلەفۆن و پەیوەندی هەیە لەگەڵ بەرپرسانی شیعە لە هاوپەیمانێتی چوارچێوەی هەماهەنگی ئەو لایەنە شیعانەی لە حکومەت بەشدارن، لەگەڵ بەرپرسانی شیعە قسە کراوە و زۆربەیان لەگەڵ چارەسەرن، ئەمەش ڕێگەخۆشکەرە بۆ ئەوەی سوودانی بتوانێت بڕیار بدات.

لێدوانی فەرمی: لەبارەی کارنامەی کۆبوونەوەی ئەنجوومەنی وەزیران، بەرپرسێکی باڵا لە ئەنجوومەنی وەزیرانی عێراق بە ئاڤای گوت، بەهۆی ئەوەی ئەمڕۆ پشوو بوو تاوەکو ئێستا کارنامەی کۆبوونەوەکە دیارینەکراوە و سبەی دووشەممە کارنامە دادەنرێت.

هەرێمی کوردستان ئەم  ئەم هەفتەیە چاوەرێ دەکات، ئەگەر حکومەتی عێراق وەڵامی کۆتایی نەدایەوە و بڕیاری ناردنی مووچەی نەدا و هەر بیانووی گرت، ئەوا حکومەتی کوردستان بژاردەکانی خۆی دەخاتەڕوو.