بۆ چوارەم جار ئاگر لە چیای برادۆست کەوتەوە و کۆنترۆڵ کرا

ئاڤا نیوز

دوای ئەوەی بۆ جاری چوارەم ئاگر لە چیای برادۆست کەوتەوە، درەنگانی شەوی ڕابردوو ئاگرەکە کۆنترۆڵ کرا.

چیرۆکی سەرەکی: لە ماوەی پێنج ڕۆژی ڕابردوو، چوار جار ئاگر لە چیای برادۆستی سنووری ئیدارەی سەربەخۆی سۆران کەوتووەتەوە، بەرگریی شارستانیی سۆرانیش گومان دەکات ئاگرەکان بە دەستی ئەنقەست لە پووش و پاوان و دارستانی چیاکە بەردرابێت.

لێدوانی فەرمی: ڕەوەند هاودیانی، وتەبێژی بەرگریی شارستانیی ئیدارەی سەربەخۆی سۆران بە ئاڤای گوت، درەنگانی شەوی ڕابردوو بۆ جاری چوارەم ئاگر لە چیای برادۆست کەوتەوە و کۆنترۆڵ کرا.

لە ماوەی پێنج ڕۆژدا چوار جار ئاگر لە چەند شوێنێکی نزیک یەکتری چیاکە کەوتووەتەوە، بۆیە گۆمان دەکرێت ئاگرەکان بە دەستی ئەنقەست بێت.

زانیاریی زیاتر: ئاگرەکانی چیای برادۆست کەوتووەتە نزیک هەردوو گوندی بێلەنگر و مەجیداوە، شوێنی ئاگرەکان سەختە و ئۆتۆمبێلی ئاگرکوژێنەوەی پێناگات، بۆیە هەموو جارێک ئاگرەکان بەدەست و بە بەکارهێنانی ئامێری هەوایی کۆڵەپشت کۆنترۆڵ کراون.

ئەمەش بزانە: لەو چوار ئاگرە زیاتر لە 50 دۆنم پووش و پاوان و دارستانی چیاکە سووتاون.