پرۆسەی دابەشكردنی بەنزینی 750 دیناری ئاسایی دەبێتەوە

ئاڤا نیوز

لە ڕۆژی شەممەی داهاتووەوە، دابەشكردنی بەنزینی 750 دیناری لە هەولێر، ئاسایی دەبێتەوە و ڕۆژانە لە 25 وێستگە دابەش دەكرێت.

وێنە گەورەكە: زیاتر لە هەفتەیەكە، دابەشكردنی بەنزینی حكومی بە نرخی پاڵپشتیكراو، لە بەنزینخانەكانی شاری هەولێر و دەوروبەری كەمبووەتەوە. بەو هۆیەوە نۆرەی دوور و درێژی ئۆتۆمبێل لە بەردەم چەند بەنزینخانەیەك دروست دەبوو، بەو پێیەی هاووڵاتیان بە زەحمەت بەنزینیان دەستدەكەوت.

زانیاریی بەدەستهاتوو: سەرچاوەیەك لە بەڕێوەبەرایەتیی نەوت و كانزاكانی هەولێر بە ئاڤای ڕاگەیاند، سەرەتای هەفتەی داهاتوو؛ بەدیاریكراوی لە ڕۆژی شەممە 9ـی ئابی 2025، پرۆسەی دابەشكردنی بەنزینی 750 دیناری لە بەنزینخانەكان ئاسایی دەبێتەوە و لە 25 بەنزینخانە ئەمجۆرە بەنزینە دابەش دەكرێت.

ئەوەی پێویستە بیزانیت: بەهۆی هێرشە درۆنییەکانی مانگی ڕابردوو بۆ سەر كێڵگە نەوتییەكانی هەرێمی كوردستان، ئاستی بەرهەمهێنانی سووتەمەنی بۆ نیوەی ئاستی ئاسایی دابەزی، بەهۆیەوە  پێدانی بەنزین بە نرخی پاڵپشتیکراو کەمبووەوە.