خانەنشینانی نوێ مامەڵەکانیان تەواو بوو؛ ئاڤا وردەکاری دابەشکردنی مووچەکانیان ئاشکرا دەکات

ئاڤا نیوز

مامەڵەی خانەنشینی ئەو فەرمانبەرانەی لەدایکبووی ساڵانی 1962، 1963 و 1964 بوون و لە سەرەتای ئەمساڵەوە خانەنشین بوون، تەواو بووە و ناویان خراوەتە سەر لیستی مووچەی مانگەکانی شەش، حەوت و هەشت. شەش تا هەشت مووچە بەیەکەوە وەردەگرن، کە ژمارەیان نزیکەی 23 هەزار کەس دەبێت.

وێنە گەورەکە: بەهۆی هاوتاکردنی تەمەنی خانەنشینی لە هەرێمی کوردستان لەگەڵ عێراق، کە لە 63 ساڵەوە بۆ 60 ساڵ کەمکرایەوە. ژمارەیەکی زۆری فەرمانبەران لە سەرەتای ئەمساڵەوە خانەنشین بوون.

لێدوانی فەرمی: سەرچاوەیەک لە بەڕێوەبەرایەتیی گشتیی خانەنشینانی هەرێمی کوردستان بە ئاڤای گوت، "مامەڵەی 400 فەرمانبەری دیکەش کە لەسەرەتای ئەمساڵ خانەنشین بوون تەواو بووە و ئەوانیش لەگەڵ لیستی مووچەی مانگی هەشتدا، هەشت مووچەی خانەنشینی بەیەکەوە وەردەگرن."

لەلایەکی دیکەوە: بەڕێوەبەرایەتیی گشتیی خانەنشینی لە ئێستادا دەستی بە کارکردن لەسەر مامەڵەی خانەنشینیی لەدایکبووانی ساڵی 1965 کردووە. هەروەها ڕۆژانە کار لەسەر چارەسەرکردنی ئەو مامەڵانە دەکرێت کە کەم و کوڕی یان گرفتیان تێدایە بۆ ئەوەی بە زووترین کات کارەکانیان تەواو بکرێت.