بەشداربووانی بانکی IDB دەگوازرێنەوە بانکی دیکە

ئاڤا نیوز

دوای دوورخستنەوەی بانکی گەشەپێدانی نێودەوڵەتی (IDB) لە پڕۆژەی هەژماری من، بەشداربووانی ئەو بانکە دەگوازێنەوە سەر بانکی دیکە.

چیرۆکی سەرەکی: ڕۆژی دووشەممەی ڕابردوو 2025-09-08، وەزارەتی دارایی هەرێمی كوردستان دوورخستنەوەی بانکی پەرەپێدانی نێودەوڵەتی لە پڕۆژەی هەژماری من ڕاگەیاند، ئەمەش بەهۆی سنووردارکردنی خزمەتگوزارییە بانکییەکانی بانکی ناوبراو لەلایەن بانکی ناوەندی عێراق لەڕووی مامەڵەکردن بە دۆلار.

لێدوانی فەرمی: تیمی هەژماری من بە ئاڤا میدیای ڕاگەیاند، دوای دوورخستنەوەی بانکی گەشەپێدانی نێودەوڵەتی لە پڕۆژەی هەژماری من، بەشداربووانی ئەو بانکە دەگوازرێنەوە سەر بانکی دیکە، بۆ ئەم مەبەستەش ڕێنمایی تایبەتمان دەرکردووە.

چارەسەرەکان: چارەسەری بەشداربووانی بانکەکە بەمجۆرە دەبێت:

٠ ئەو کەسانەی خۆیان تۆمار کردووە بەڵام کارتیان وەرنەگرتووەتەوە، مووچەکەیان هەر وەک پێشتر بە کاش وەردەگرن تاکو تیمی هەژماری من پڕۆسەی گۆڕینی بانکەکەیان تەواو دەکەن و دواتر ئاگاداریان دەکەنەوە لە گۆڕانی بانکەکەیان و هەنگاوەکانی داهاتوو.

٠ ئەو کەسانەی خۆیان تۆمار کردووە و کارتی بانکییان وەرگرتووەتەوە، بەڵام تاکو ئێستا مووچەیان لە ڕێگەوە وەرنەگرتووە، مووچەکەیان هەر وەک پێشتر بە کاش وەردەگرن تاکو کارتە بانکییە نوێیەکەیان ئامادە دەبێت و پەیوەندییان پێوە دەکرێت کە وەریبگرینەوە، دواتر مووچەکەیان دەچێتە سەر هەژمارە بانکییە نوێیەکەیان.

٠ ئەو کەسانەی کارتی بانکییان وەرگرتووەتەوە و مووچەکەیان بە شێوەی دیجیتاڵی وەرگرتووە، بەردەوام دەبن لە وەرگرتنی مووچەکەیان لە ڕێگای هەژماری بانکی گەشەپێدانی نێودەوڵەتی هەتا ئەو کاتەی تیمی هەژماری من پەیوەندییان پێوە دەکەن و کارتە نوێیەکەیان وەردەگرنەوە.