هەژماری من لەڕێگەی ئاڤاوە هۆشداری بە زیاتر لە 200 هەزار مووچەخۆر دەدات

ئاڤا نیوز

هەژماری من لەڕێگەی ئاڤا میدیاوە هۆشداری بە زیاتر لە 200 هەزار مووچەخۆر دەدات، بۆ ئەوەی بەزووترین کات و لە ماوەی 30 ڕۆژی داهاتوودا خۆیان لە پڕۆژەکە تۆمار بکەن ئەگەر نا مووچەیان ڕادەگیرێت.

وێنە گەورەکە: نزیکەی ملیۆنێک و 200 هەزار مووچەخۆر لە هەرێمی کوردستان هەن، نزیکەی ملیۆنێکیان لە هەژماری من تۆمارکراون و  200 هەزاریان ماون تا ئێستا خۆیان لە پرۆژەکە تۆمار نەکردووە.

لێدوانی فەرمی: تیمی هەژماری من بە ئاڤایان وت: تاوەکو ئێستا نزیکەی ملیۆنێک مووچەخۆر تۆمارکراون، دەتوانین بڵێین سەرجەم مووچەخۆرانی مەدەنی خۆیان لە هەژماری من تۆمارکردووە و مامەڵەكانیان تەواوبووە.

ئەوانەی ماون، سوودمەندانی تۆڕی کۆمەڵایەتی 163 هەزار و 91 کەسن، خاوەن پێداویستییە تایبەتەکان، واتا کەمئەندامان، چاودێری کۆمەڵایەتی و کەمئەندامانی سەنگەر دەگرێتەوە. لەگەڵ وارسی شەهیدان و ئەنفالكراوانن کە ژمارەیان 96 هەزار و 779 کەسە. بەشێکی خانەنشینانیش ماون هێشتا خۆیان تۆمار نەکردووە.

داواکاری فەرمی: هەژماری من دەڵێت، ئەوانەی تا ئێستا فۆرمی 'هەژماری من'ـیان پڕنەكردووەتەوە، پێویستە لەنزیكترین كاتدا سەردانی یەكێك لە بانکە حكومییەكان بكەن، لەگەل خۆشیان ئەم شتانە ببەن:

٠ کۆپی ڕەنگاوڕەنگی كارتی نیشتمانی
٠ كارتی زانیاری
٠ ناسنامەی خانەنشینی
٠ ناسنامەی كەسوكاری شەهیدان
٠ ناسنامەی سوومەندبووانی كۆمەڵایەتی 
٠ وێنەیەکی ڕەنگاوڕەنگی مامەڵە، لەگەڵ پاسپۆرت ئەگەر هەبێت.

ئەوەی پێویستە بیزانیت: بڕیارەکە جدییە و هی بەغدایە، وەزارەتی دارایی عێراق 31ـی 12ـی ئەمساڵی دیاریکردووە، هەر مووچەخۆرێک هەژماری بانکی نەبێت مووچەکەی ڕادەگرێت.