تونس بۆ زیادكردنی بەرهەمی زەیتوون یارمەتی هەرێمی كوردستان دەدات

ئاڤا نیوز

ژمارەیەك كۆمپانیای كشتوكاڵی وڵاتی تونس مەبەستیانە لە هەرێمی كوردستان وەبەرهێنان بكەن بەمەبەستی زیادكردنی بەرهەمی زەیتوون لە هەرێمی كوردستان.

وێنە گەورەكە: ئەمڕۆ بەڕێوەبەری گشتیی تۆماركردنی كۆمپانیاكان پێشوازی لە بەڕێوەبەری گشتی كشتوكاڵی تونس و نوێنەری بەشێك لە كۆمپانیا كشتوكاڵییەكانی ئەو وڵاتە كرد كە بەیاوەری شاندێكی ڕێكخراوی نەتەوە یەكگرتووەكان بۆ پەرەپێدان هاتوونەتە هەرێمی كوردستان و ئامانجیانە وەبەرهێنان لە بواری پەرەپێدانی بەرهەمی زەیتوون بكەن.

ڕاگەیێنراوی فەرمی: بڵند محەممەد مەم، بەڕێوەبەری گشتی تۆماركردنی كۆمپانیاكان ڕایگەیاند: بایەخدان بە بووژاندنەوەی سێكتەری كشتوكاڵ و پاڵپشتیكردنی بەرهەمی ناوخۆ لەپێناو فرەچەشنكردنی سەرچاوەی داهات، لە كارنامەی سەرەكی حكومەتی هەرێمی كوردستانە و چەندین ڕاسپاردە و زانیاریی پێویستی بە شاندەكە دا بۆ كارئاسانیی وەبەرهێنان لە كەرتی كشتوكاڵی هەرێمی كوردستاندا.

ئەوەی پێویستە بیزانیت: تونس سەرەڕای بچووكی ڕووبەرەكەی، یەكێكە لەو وڵاتانەی كە خاوەنی ملیۆنان داری زەیتوونە و ساڵانە هەزاران تۆن زەیتوون هەناردەی دەرەوە دەكات و بووەتە سەرچاوەیەكی داهات بۆ ئەو وڵاتە، هەرێمی كوردستان مەبەستیەتی سوود لە ئەزموونی دەوڵەندی ئەو وڵاتە وەربگرێت.