حیزبەکەی حەلبووسی دەنگ بەهەمواری یاسای بودجە دەدات

ئاڤا نیوز

فراکسیۆنی تەقەدوم لەپەرلەمانی عێراق ئاشکرایکرد، لەدانیشتنی ڕۆژی یەکشەممەی داهاتوو فراکسیۆنەکەیان دەنگ بە هەمواری یاسای بودجە دەدات.

وێنە گەورەکە: دوای چەند جارێک لە دروستکردنی بەربەست لەبەردم تێپەڕاندنی هەمواری یاسای بودجە، لە کۆبوونەوەی شەوی چوارشەممەی نێوان سەرۆکوەزیرانی عێراق و سەرۆکی فراکسیۆنەکان لێکتێگەشتنێکی گشتیی پەسەند کرا بۆ تێپەڕاندنی هەمواری یاسای بودجە.

لێدوانی فەرمی: هەیبەت حەلبووسی، سەرۆکی فراکسیۆنی تەقەدوم کە لەهەمانکاتدا سەرۆکی لیژنەی نەوت و وزەیە لە ئەنجوومەنی نوێنەرانی عێراق ڕایگەیاند: لەدانیشتنی ڕۆژی یەکشەممەی داهاتوو سەرجەم ئەندامانی فراکسیۆنەکەیان دەنگ بە هەمواری یاسای بودجە و دەستپێکردنەوەی هەناردەی نەوتی هەرێمی کوردستان دەدەن.

بۆچی گرنگە: بەگوێرەی هەمواری بڕگەی (ج) لە ماددەی 12 لە یاسای بودجە، تێچووی بەرهەمهێنان و گواستنەوەی نەوتی کوردستان لە 6 دۆلارەوە بۆ 16 دۆلار زیاد دەکرێت، لەسەر ئەو بنەمایەش بڕیارە هەناردەی نەوتی هەرێمی کوردستان ڕاستەوخۆ دەستپێبکاتەوە.

ئەوەی پێویستە بیزانیت: چوارشەممە 29-1-2025، لە ماڵی محەممەد شیاع سوودانی، سەرۆكوەزیرانی عێراق، لە شاری بەغدا سەبارەت بە هەموارکردنەوەی یاسای بودجە و پرسی مووچەی خەڵکی کوردستان كۆبوونەوە لە نێوان سوودانی و سەرۆک و جێگرانی سەرۆکی پەرلەمانی عێراق و سەرۆکی سەرجەم فراکسیۆنەکانی پەرلەمانی عێراق كرا.