بازرگانی عێراق: ئەمساڵ زیاتر لە پێنج ملیۆن تۆن گەنم وەردەگرین

ئاڤا نیوز

 

وەزارەتی بازرگانیی عێراق دەڵێت، دوو هەفتەیە لە پارێزگاکانی باشووری وڵات پرۆسەی وەرگرتنی گەنم دەستیپێکردووە و ئەمساڵیش وەزارەتەکەیان پلانی هەیە زیاتر لە پێنج ملیۆن و 300 هەزار تۆن گەنم وەربگرێت.

 

چیرۆکی سەرەکی: عێراق ساڵانە پێویستی بە پێنج ملیۆن تۆن گەنم هەیە و وەک بەرپرسانی کشتوکاڵی دەڵێن، پێشبینی دەکەن ئەمساڵیش ئاستی بەرهەمی گەنم ئەو بڕە تێپەڕێنێت و ئەگەر زیاتریش بێت، هەناردەی دەرەوەی وڵات دەکرێت.

 

لێدوانی فەرمی: محەممەد حەنون، وتەبێژی وەزارەتی بازرگانیی عێراق ڕایگەیاند، وەزارەتەکەیان دوو هەفتەیە لە زیقار و بەسڕە و پارێزگاکانی دیکەی باشوور دەستی بە وەرگرتنی گەنم کردووە و سایلۆکانیش بۆ وەرگرتنی گەنم ئامادەکراون، بڕیاریشە هاوشێوەی ساڵی ڕابردوو لە نێوان 24 کاتژمێر بۆ هەفتەیەک پارەی جوتیاران خەرج بکرێت.

 

لەبارەی ئەو گەنمەی وەریدەگرن، وتەبێژی وەزارەتی بازرگانی دەڵێت، ئەمساڵ وەزارەت پلانی هەیە زیاتر لە پێنج ملیۆن و 300 هەزار تۆن گەنم وەربگرێت، تۆنێک گەنمی بەرهەمهاتوو بە شێوازی نوێ و بە مەڕەشە بە 850 هەزار دینار و تۆنێک گەنمی بەرهەمهاتوو بە ئاوی باران بە 800 هەزار دینار لە جوتیاران دەکڕنەوە، هۆکاری ئەوەشی کە گەنمی بەرهەمهاتوو بە مەڕەشە گرانترە بۆ ئەوەیە جوتیاران پشت بە شێوازی بەرهەمهێنانی سەردەمییانە ببەستن.