هەفتەی داهاتوو لیستی مووچەی مانگی پێنج ڕەوانەی بەغدا دەکرێت

ئاڤا نیوز

ئامادەکردنی لیستی مووچەی مانگی پێنج لە تەواوبوونەو سەرەتای هەفتەی داهاتوو ڕەوانەی بەغدا دەکرێت.

وێنە گەورەکە: کارکردن لەسەر ئامادەکردنی لیستی مووچەی مانگی پێنج بەردەوامە، بە ئامانجی ئەوەی پێش جەژن مووچەی فەرمانبەران خەرج بکرێت.

لێدوانی فەرمی: سەرچاوەیەک لە وەزارەتی دارایی و ئابووریی هەرێمی کوردستان بە ئاڤای ڕاگەیاند، سبەی پێنجشەممە ئامادەکردنی لیستی مووچە تەواو دەبێت. بەڵام سبەی لیستەکە بۆ بەغدا نانێردرێت بەهۆی پشووی هەفتانە، بەڵکو ناردنی دەکەوێتە سەرەتای هەفتەی داهاتوو، واتا ڕۆژی یەکشەممە کە دەکاتە 25ـی مانگ یان ڕۆژی دواتر دووشەممە.

لەلایەکی دیکەوە: ئەندامێکی شاندی کوردستان کە مانگانە سەردانی بەغدا دەکەن بۆ پرسی مووچە، بە ئاڤای گوت؛ ئەگەر تاوەکو یەکشەممە لیستی مووچەمان بەدەست بگات، ئەوا یەکشەممە دەچینە بەغدا و لیستی مووچەش لەگەڵ خۆمان دەبەین. ئیتر هەفتەی داهاتوو لە وەزارەتی دارایی عێراق وردبینیکردن لە لیستی مووچە دەستپێدەکات و چەند ڕۆژێک دەخایەنێت.

زانیاریی بەدەستهاتوو: ئاڤا زانیویەتی هەفتەی داهاتوو پشکی بەغداش لە داهاتی ناوخۆ ڕادەست دەکرێت. لە هەفتەی ڕابردووشەوە تەرازووی پێداچوونەوە - میزان موراجەعە، ڕاپۆرتی داهات و خەرجی وەزارەتەکان بۆ بەغدا نێردراوە.

ئەمە ئەرکەکانی حکومەتی کوردستانن لەبارەی مووچە، ئیتر ناردنی پارە دەکەوێتە سەر وەزارەتی دارایی عێراق.