دابەزینی نرخی نەوت قەیرانەکانی عێراق زیاتر دەکات

ئاڤا نیوز

دابەزینی نرخی نەوتی خاو لە لە بۆرسەی جیهان، عێراق ڕووبەڕووی قەیرانێکی دارایی گەورە دەکاتەوە و شارەزایانی ئابووریش هۆشداری لە كاریگه‌رییەکانی دەدەن.

 

وێنە گەورەکە: لە یاسای بودجە سێ ساڵییەکەی عێراق 2024، 2023، 2025 نرخی هەر بەرمیلێک نەوت بە 70 دۆلار خەمڵێندراوە، دابەزینی نرخەکەی بۆ نزیکەی 60 دۆلار کورتهێنانێکی گەورە لە بودجەی گشتیی دروست دەکات، چونکە ئابووری عێراق بە ڕێژەی زیاتر لە 90% پشت بە داهاتی هەناردەکردنی نەوت دەبەستێت.

 

لێدوانی فەرمی: د. ئەحمەد نەجم، ئابووریناسی عێراق بە ئاڤا میدیای ڕاگەیاند:  دابەزینی نرخی نەوت کاریگەریی نەرێنی لەسەر جێبەجێکردنی پڕۆژەکانی وەبەرهێنان و پێدانی شایستە داراییەکانی کەرتی تایبەت دەبێت، ئەوەش ئابووریی عێراق تووشی شڵەژان دەکات.

 

هاوکات باسی لەوەشکرد: بەئەگەرێکی زۆرەوە بڕە پارەی بودجەی ساڵی 2025 دەگاتە نزیکەی 200 ترلیۆن دینار، بۆیە بەردەوامی دابەزینی نرخی نەوت دەبێتە هۆی کەمی نەختینەیی دارایی.

 

کاریگەریی و لێکەوتەکان: بەگوێرەی داتاکانی حکومەت، ساڵانە نزیکەی 90 تریلیۆن دینار بۆ مووچەی فەرمانبەران و خانەنشینان خەرج دەکرێت، بۆیە دابەزینی نرخی نەوت کاریگەریی لەسەر دابینکردنی پارەی نەختینەیی بۆ خەرجکردنی مووچەی مووچەخۆران دەبێت و بۆ پڕ کردنەوەی ئەو کورتهێنانەش وەزارەتی دارایی عێراق پەنای بردووەتە بەر قەرزکردن لە بانکە حکومییەکان. 

 

به‌ته‌نیشت ئه‌م بابه‌ته‌وه‌: وەزارەتی دارایی عێراق، لە نوسراوێکی فەرمیدا کە ئاڕاستەی سەرۆکایەتیی ئەنجوومەنی وەزیرانی کردووە، جەخت لەوە دەکاتەوە کە گەنجینەی گشتیی بەرگەی بەهەمیشەکردنی فەرمانبەرانی گرێبەستی وەزارەتی نەوت ناگرێت.

 

ئەمەش بزانە: عێراق مانگانە نزیکەی 100 ملیۆن بەرمیل نەوت هەناردەی بازاڕەکانی جیهان دەکات،  بەپێی دوایین ئاماری وەزارەتی نەوتی عێراق داهاتی مانگی نیسان لەهەناردەکردنی نەوت نزیکەی 6.7 ملیار دۆلار بووە.