وەزیری بەرگریی ئەمریکا: ڕێگە نادەین ئۆکرانیا شکست بهێنێت

ئاڤا نیوز

 

ئەگەرچی هێشتا ئەنجوومەنی نوێنەرانی ئەمریکا ئەو هاوکارییەی ڕاگرتووە کە بڕیارە واشنتن بۆ کیێڤی بنێرێت، بەڵام وەزیری بەرگریی ئەمریکا بەڵێنی دا کە لێناگەڕێن ئۆکرانیا شکست بهێنێت.

 

وێنە گەورەکە: کۆمارییەکانی ئەنجوومەنی نوێنەرانی ئەمریکا بەستەکێکی هاوکاریی 60 ملیار دۆلاریی وڵاتەکەیان بۆ ئۆکرانیا ڕاگرتووە و ناهێڵن بنێردرێت. بەڵام هەفتەی ڕابردوو ڕێگەیان دا تەنیا 300 ملیۆن دۆلار بۆ ئۆکرانیا بنێردرێت و وەزارەتی بەرگریش دەڵێت، تەنیا بەشی چەند هەفتەیەک دەکات.

 

لێدوانی فەرمی: لۆید ئۆستن، وەزیری بەرگریی ئەمریکا ڕایگەیاند: "ئەمریکا لێناگەڕێت ئۆکرانیا شکست بهێنێت؛ سوورین لەسەر دابینکردنی ئەو پێداویستییانەی ئۆکرانیا بۆ بەرەنگاربوونەوەی کرێملین پێویستی پێیەتی".

 

ئەمەش بزانە: دوێنێ زێلێنسکی، سەرۆکی ئۆکرانیا ڕایگەیاند کە زۆر پێویستیان بە هاوکارییەکانی ئەمریکا هەیە و داوای لە ئەنجوومەنی نوێنەرانی ئەو وڵاتە کرد ڕێکارەکانی ناردنەکە تەواو بکات.