چین: دەستوەردانمان لە هەڵبژاردنەکانی ئەمریکا نەکردووە

ئاڤا نیوز

 

دوای ئەوەی ئەنتۆنی بلینکن چینی تۆمەتبار کرد بە دەستێوەردان لە هەڵبژاردنەکانی ئەمریکا، وەزارەتی دەرەوەی چین تۆمەتەکانی ڕەت کردەوە.

 

چیرۆکی سەرەکی: سیاسەتمەدارانی ئەمریکا زۆرجار وڵاتانی دیکە بە دەستوەردان لە هەڵبژاردنەکان تۆمەتبار دەکەن، هەفتەی ڕابردووش وەزیری دەرەوەی ئەمریکا ڕایگەیاند، چین دەستکاری ئەنجامی هەڵبژاردنەکانی ئەمریکای کردووە.

 

لێدوانی فەرمی: لین جیان، گوتەبێژی وەزارەتی دەرەوەی چین گوتی: "دەستوەرنەدان لە کاروباری ناوخۆی وڵاتانی دیکە بنەمایەکی بنەڕەتییە بۆ دیپلۆماسییەتیی چین".

 

زانیاریی زیاتر: پێشتر ترەمپ و بایدن چینیان بەوە تۆمەتبار دەکرد کە دەستوەردانی لە هەڵبژاردنەکانی ئەمریکا کردووە، تەنانەت بایدن لە کۆبوونەوەیەکدا سەرۆکی چینی لەو بابەتە ئاگادار کردووەتەوە. 

 

لە لایەکی دیکەوە: بەپێی زانییارییەکانی سی ئێن ئێن، شی جینپینگ بە بایدن ڕاگەیاندووە کە چین هیچ دەستوەردانێک لە هەڵبژاردنەکانی ئەمساڵی ئەمریکا ناکات.